Monday, November 03, 2014

الــجــمــعــة الــجــايــة .. عـــيـــد :)







نقول كمان

علشان اللي أول مرة يدخل المدونة و يقرا فيها

و مش فاهم الموضوع و بيسأل أسئلة كتيرة

و أبدأ كلامي بــ

بسم الله

الحكاية بدأت لما كنت فى تانية ثانوي أو تالتة ثانوي

ونجلاء صاحبتنا فجأة تعبت فى المدرسة

و نقلوها مستشفى الهرم

و بعد الكشف عليها إتضح إنها محتاجة تعمل فورا عملية الزايدة

و رحنا زورناها بعد اليوم الدراسي

و أثناء زيارتي ليها في المستشفى

لقيت أوضة مكتوب عليها " حجرة التبرع بالدم "

و فجأة قررت إنى أتبرع بالدم

و دخلت فعلا الأوضة

مش فاكرة الحوار اللى جرى بيني و بين الممرضة ساعتها

بس فاكرة إنى إتبرعت بالدم يوميها

و خرجت من الأوضة و أنا حاسة إحساس رهيب بالسعادة

و إحساس رهيب بالعطاء

و كنت منتشية جدااااا

و راضية عن نفسي جداااااا

و عندي إحساس جميل أوي إن ربنا راضي عني و بيحبني

خرجت من الأوضة و أنا عاشقة للتبرع بالدم

و معرفش إيه سبب عشقي له ساعتها



فاكرة انى بعد ما اتبرعت بالدم و طلعت تانى أبص على نجلاء

 و أخد مروة و أمانى معايا علشان نروح بيوتنا

فاكرة إن البنات سألونى إنتى إختفيتي فين يا نونو ؟

قلتلهم و انا منشكحة أوى : كنت بتبرع بالدم

فاكرة إن رد فعلهم كان متشابه

و كلهم قالولي يا مجنونة

و مخوفتيش من الحقنة

مش خايفة يجيلك هبوط

هو إنتى عندك دم أساسا

أنا مكونتش برد عليهم

أنا بس كنت عمالة أضحك أوي

 لأني كنت مبسوطة فعلا وقتها



و تمر الأيام و الأسابيع و الشهور

و أنسى موضوع التبرع بالدم ده

و أدخل جامعة اكتوبر

و بعد شهرين من دخولى الجامعة

 ألاقي فيه عربية تابعة لمركز نقل الدم

و جنبها واحد لابس بالطو ابيض

و معاه ميكروفون و بيدعو الطلبة إنهم يتبرعوا بالدم

و أدخل العربية و اتبرع بالدم

و أخرج منها و أنا مبسوطة و سعيدة

 و منشكحة و حاسة إن ربنا بيحبنى

و يتكرر مشهد العربية فى كل تيرم

على مدار سنوات الدراسة الأربعة

و كنت بتبرع فى كل مرة اشوف فيها العربية

ساعتها كنت كبرت و نضجت و قدرت أفسر عشقى للتبرع بالدم

قدرت أحلل إن التبرع بالدم يجمع بين نقيضين

و أنا أااااه لو تعلمون كم أحب النواقض

فالتبرع بالدم أرخص و أغلى أنواع التبرع

فهو لا يكلف المتبرع  أي ماديات على الإطلاق

و فى نفس الوقت هو أغلى أنواع التبرع و مساعدة المحتاج

حيث ان الدم يعني .. حياة

و حياة الإنسان .. أي إنسان .. غالية

و أنا مش غنية

أنا عادية

مستورة و الحمد لله

بس ساعات بيبقى نفسي أساعد البشر

و مبيكونش معايا فلوس أقدر أقدمها لمحتاج

و مبلاقيش حاجة اقدر اقدمها  لمحتاج غير دمي

حاجة مش هتكلفنى فلوس

لكن فى نفس الوقت هى حاجة مهمة جدا

 و أهم من أى فلوس للى محتاجها

حاجة لو مش موجودة  .. ملايين الجنيهات متقدرش تعوض عنها

لو واحد غنى أوى و له حد محتاج نقل دم

و ملقاش ولا كيس فى أي مستشفى

فلوسه ساعتها مش هتنفعه

و هيكون مستعد يدفع في كيس واحد من الدم ملايين الجنيهات

 علشان  ينقذ حبايبه اللى محتاجين نقل دم



التبرع بالدم ده حاجة مش هتكلف المتبرع أي حاجة

و لكنها تعني للمحتاج كل حاجة



و أتخرج من الجامعة

و أقرر إنى  مبطلش تبرع بالدم

و إتبرعت فى كل مستشفى تقابلني على مدار سنين عمرى

لحد ما فى يوم رحت أتبرع فى مركز التبرع بالدم

 اللى جوة هيئة المصل و اللقاح اللي فى الدقي

و هناك لقيت معاملة مختلفة

 و إهتمام بالمتبرع مختلف خالص

هناك نظام

نظافة

 استمارات مليانة أسئلة

و تحليل هيمجلوبين للمتبرع

و قياس ضغط

و إبتسامة حلوة أثناء التبرع

و عصير .. و كلمة شكرا بعد التبرع

و إبتسامة حلوة تانية و إنت ماشي من عندهم

و قررت ساعتها إنى متبرعش غير عندهم

لحد ما في يوم رحت أتبرع

و ده كان بعد دخولى عالم التدوين بكام شهر

و بعد عمل تحليل الهيمجلوبين  .. لقوا إن عندى أنيميا

رفضوا إنهم ياخدوا منى دم

ساعتها عملتلهم قردة

و اقعدت أتنطط و أتحايل عليهم إنهم ياخدوا منى دم برضه

و إن موضوع عدم تبرعى ده هيأثر عليا نفسيا

و إنى هكون متضايقة

و هما بإبتسامتهم اللطيفة الودودة يرفضوا

و يحاولوا يفهمونى إن ده خطر عليا

 و خطر حتى على اللى هيتنقله الدم

و إن دمى كدة مش هيفيد أى حد

و يقولولى إتغذى كويس

و تعاليلنا كمان شهر أو شهرين  تكون نسبة الهيمجلوبين إتحسنت

و أمشى من عندهم و أنا محبطة و زعلانة

و يعدى الشهر أو الشهرين

و أكتب ساعتها  هنا على المدونة

 إنى رايحة أتبرع بالدم

و أقولكم لو تحبوا تيجوا معايا نروح نتبرع

و فعلا يجي منكم ناس إتحمست للفكرة

و كانت أول مرة ليا اتبرع بالدم معاكم

 كانت فى اول يوم سبت من شهر إبريل سنة 2008

و أرجع مبسوطة يوميها جدا

 و أقرر إن التبرع بالدم يكون كل أربع شهور .. معاكم

لأن صُحبتكم حلوة 

و بالفعل بعد كام مرة تبرع .. تتظبط المواعيد و تستقر

 و تكون مواعيد محددة من كل سنة

أول جمعة من مارس

أول جمعة من يوليو

أول جمعة من نوفمبر



و التلات أيام دول  من كل سنة يعتبروا بالنسبالي أيام عيد

و الله بفرح بيهم و فيهم أكتر من فرحتي بالأعياد الرسمية



و يطلق على حملة التبرع بالدم بــــ 

" الحملة الخيخية للتبرع بالدم"

نسبة لإسمي الحركي " خيخة "

و اللي أطلق عليها الإسم ده

واحد من القراء الأعزاء عجبته الفكرة ساعتها
و أنا عاجبني الإسم بصراحة و أبقيت عليه
:)



و تستمر الحملة الخيخية  للتبرع بالدم سبع سنين متواصلة

و إن شاء الله تستمر طول العمر



و أوصيكم دايما  في حال موتي

 متبطلوش تتبرعوا بالدم

إتبرعوا دايما

و اللى فيكم مش طايقني  لأي سبب

 و مش عايز يجي يتبرع معايا

ميبطلش يتبرع برضه

اتبرعوا فى أي مكان قريب منكم

فى أي وقت تختاروه

بس إتبرعوا

متبطلوش تتبرعوا بالدم

و وصيتي ليكم برضه

انكم تزرعوا فى ولادكم ثقافة التبرع الدم

و إياكم تنسوا شريف في حال موتي

لما يكبر خلوه يتبرع بالدم معاكم

خدوه معاكم و شجعوه

قولوله إن الحقنة مبتوجعش

احرصوا على انه يكون حريص على التبرع بالدم و مواظب عليه

حببوه فى التبرع بالدم



و بس كدة

هى دى حكايتي مع التبرع بالدم من طق طق لــسلاموعليكو

:)





أما إنتوا بقى

فمش هاوصيكم

إنتوا عارفين التعليمات بتاعة كل مرة

إتغذوا كويس

و إفطروا كويس يوم التبرع

خدوا معلقة عسل إسود كل يوم

كلوا حاجات فيها حديد

و يوم التبرع اشربوا سوايل كتير

متمشوش في الشمس بعد التبرع

متشربوش سجاير بعد التبرع 

البنات تلبس مايوهات تحت الهدوم لزوم الستر



و سبب لبس المايوهات اللي كل مرة انبهكم له

إنى مرة شوفت لقطة فى فيلم أجنبي

 إن واحدة أغم عليها و الناس جت تشيلها فبطنها بانت

فعلشان كدة بقولكم إلبسوا مايوهات تحت الهدوم

علشان فى حال لا قدر الله واحدة منكم حصلها هبوط بعد التبرع

 و جينا نشيلها  .. جسمها مايبانش

 و ربنا يسترنا جميعا يارب

:)





الممنوعين من التبرع

الحامل

 المرضع

 الحائض

 النفاس

مرضى السكر

 اللى عملوا أي علاج في أسنانهم خلال ال 4 شهور الأخيرة

اللي عملوا أي عمليات جراحية خلال ال 6 شهور الأخيرة

اللي عندهم أنيميا طبعا

واللي أقل من 16 سنة واللى اكبر من 60 سنة





 مستنياكم يا أعز الناس  يوم الجمعة الجاية إن شاء الله

الموافق7 نوفمبر

الساعة 10 صباحا

أمام هيئة المصل و اللقاح بالدقي

و ده رقم تليفون هيكون متاح يوميها

01019790270

علشان لو حد تايه  ومش عارف يوصل

 يتصل و أوصف له المكان



اللي مش هايقدر يجي .. ياريت يعمل شير

فــ الدال على الخير كفاعله



و متجمعين دايما في كل خير يا رب

:)



___________________



إنـــتـــهـــى


14 comments:

محمد قنديل said...

ربنا يقدركم على فعل الخير
متجمعين في الخير دايماً

Anonymous said...

هو إنتي حلوة ليه يا نورا؟

Sayed Elsofey said...

موضوع مهم جدا و استمتعت بطريقة العرض

اتمني لو اقدر اساعد بجد لكن شكل الموضوع متقصر علي القاهره !

بـت خـيـخـة وأي كـلام said...

محمد قنديل

اللهم أمين يا محمد .. مفتقدينك والله

شكرا ليك
:)


___________

الغير معرف


يا دين ماما على جمال ده تعليق رغم بساطته
!!!!!!!!!!

والله العظيم أنا لما قريت التعليق ده حسيت إن رجعت من تاني طفلة ملائكية لم أرتكب أي ذنوب
:)

صحيح الكلمة الطيبة صدقة

و كما قال الشاعر كن جميلا ترى الوجود جميلا

إنت علشان بس حلو من جواك فشايفني حلوة
:))

شكرا جداا

__________________________

Sayed Elsofey

حضرتك ممكن تتبرع فى اقرب مستشفى لك
و تنشر الفكرة لكل اللى حواليك

شكرا ليك
:)


Anonymous said...

شعرت بسعادة لا نهائية وأنا أقرأ هذه التدوينة
البلد لسه فيها أمل
ربنا يتقبل منك ويبرك لك ويزيدك ويزيد من امثالك

Romancia said...

نفسى مرة اجى معاكم يا نورا بجد الحمله دى مش بس لانى نفسى ابقىمعاكم جدا بس لانى من زمان اوى كل لما اشوف عربيه تبرع بالدم بيبقى امنينتى انى ادخل اتبرع بس انا من زمان الانيميا عندى عشان انا مهمله فى صحتى شويه وبعدين حاليا ان برضع فمش هقدر للاسف بس ان شاء الله ان شاء الله اخلص رضاعه يويو حبيبى وبعدها اول حاجة هعملها هاجى معاكى ان شاء الله
ربنا يوفقك يارب ويخليلك شريف

بـت خـيـخـة وأي كـلام said...

الغير معرف

ربنا يسعدك دايما يارب

:)
شكرا لك

____________________

Romancia

إن شاء الله تكونى معانا بعد كدة يا ميرو لما يوسف يكبر شوية

ربنا يبارك فيه يارب و يخليهولك
:)

Samar Ali said...

العزيزة بنت خيخة وأي كﻻم،
اسمي سمر علي مؤسسة لمشروع فصيلتي وقرأت تدوينتك الخاصة بالتبرع بالدم وأود لو أنك تنشريها على الموقع الخاص بفصيلتي لكن بلغة عربية فصحى لو أحببتي.
يمكنك التواصل معي من خﻻل هذا البريد
samar.eldemeiri@gmail.com

بـت خـيـخـة وأي كـلام said...

Samar Ali


بصراحة مش جاي في بالى دلوقتي اعيد كتابة التدوينة بلغة عربية قصحى

فــ حضرتك ممكن تاخدي لينك التدوينة زي ماهى كدة و تنشريها في اى مكان

شكرا ليكي
:)


_______________________________


الغير معرفة اللي منشرتش تعليقها بناءا على طلبها


طيب ماشي
هارد عليكي هنا بس إعذريني هكون مختصرة في كلامي لسبب ما في نفسي
:)

أولا : أنا مش مثقفة دينيا .. و لكن أحاول أن أكون

ثانيا : أنا معنديش حل لمشكلتك .. أنا مش دكتورة نفسية

ثالثا : كل واحد فينا عنده مخاوفه التي قد تتشابه مع مخاوفك
أو قد تكون مخاوف مختلفة
و لكن ثقي تماما إنك مش لوحدك
:)

رابعا : إشغلى نفسك بحاجة و متقعديش تفكري و اقري كتير عن الموضوع ده يمكن تقدر تتوصلي لحل

بس كدة
ربنا معاك

:)

Anonymous said...

Ya afkaaaark ya khekhaa ;) el 7lw f el mwdo3 en el lamma bt7ali el mwdo3 :) law kan dammi ynfa3 kont geet etbra3t :( el marra el gayya b2a isa :)

بـت خـيـخـة وأي كـلام said...

الغير معرفة اللي منشرتش تعليقها

والله إنتي اللي محترمة
ربنا يجازيك خير على كلامك الطيب و دعواتك الجميلة
:)
و إن شاء الله تكوني كويسة وحالتك النفسية أحسن

ابقى طمنيني عنك
:)

________________________________

الغير معرف


إن شاء الله تكون/ ي معانا المرة الجاية
:)

Anonymous said...

Isa :)

Samar Ali said...

شكرًا لكِ يا أستاذة نوران،

هل في طريقة للتواصل مع حضرتك؟

بـت خـيـخـة وأي كـلام said...

Samar Ali


ده الإيميل بتاعي

nouranelshamly@yahoo.com

:)

users online